تربية الدواجن

أثر الحرارة علي تربية قطعان الدواجن

جو العنبر بيتكون من ثلاث أضلاع هم حراره وتهويه ورطوبه ولابد من جعلهم نصب عينيك حتي يشعر الطائر براحه في العنبر وبالتالي ترتفع كفائته الإنتاجيه حيث أن حدوث أي خلل في أحد الثلاثه يؤثر في باقي الأضلاع او العناصر وكذا يؤثر علي باقي مدخلات الإنتاج من تغذيه وإستهلاك مائي وحاله صحيه وفرشه وغيرها وهنتكلم النهارده عن الحرارة وأثرها البالغ علي قطعان الدواجن

  • الطيور من ذوات الدم الحار Hemo Thermic Animals فتحتفظ بدرجة حرارة جسمها بشكل ثابت ولا تتغير بتغير درجة البيئة المحيطة، ونفهم من المعلومه دى ايه نفهم ان جسم الفراخ وانظمتها الحيويه متأقلمه و بالعربي مصممه علي حرارة معينه وهي الحرارة المثلي واي تغير كبير عنها بالزياده او النقصان بيسبب خلل ومشاكل لها والمشاكل ده هنعرفها اما نيجي نتكلم عن اضرار البروده والنقيض الاجهاد الحرارى
  • ذوات الدم الحار دي بتمتلك جهاز خاص ينظم درجة الحرارة يسمى Thermo regulation system الذي يسيطر على فعاليتة وينظم عملة أسفل المهاد . hypo thalamus وهذا الجهاز هو المسئول عن تنظيم درجة حرارة الجسم

فيه شويه ثوابت بالنسبه للحرارة منها :-

  • درجة الحرارة الداخليه للطيور 42 درجه مئويه
  • درجة الحرارة المثلي للدواجن من 18ـــ22درجة مئويه والمدي ده بيسموة مدي الراحه الحرارى وفي ناس بتقول من 18-24
  • يتم إستقبال الكتاكيت علي درجة حرارة 33 من اليوم الاول وحتي الرابع بعد كده اخفض الحراره كل 2 يوم 5. 0 درجة مئويه لحد ما اوصل للمثلي
  • لو زادت حرارة التحضين عن 35 ممكن يحصل حاجه إسمها تسمم ذاتى وده هنتكلم عنه في منشور منفصل وسواء الرقم او الدرجه دي اقل او ازيد احذر فقط والتزم بالدرجةالمتفق عليها من 33-34

ما هي الوسائل اللي الطائر بيتخلص بيها من الحرارة؟؟

1_ الحمل…. هواء الزفير يحمل الحراره
2_ التوصيل…. نتيجه تلامس الهواء البارد بجسم الطائر
3_ الإشعاع…… من الجسم لاختلاف حرارة الداخل عن الخارج
{بص هو الحمل والتوصيل والاشعاع تحس انهم واحد ☝

يعنى لو ما فهمتش الفرق بينهم مش مهم المهم افهم ان في حالة وجود جسمين مختلفين في درجةالحرارةبتتنقل الحرارة من الاعلي للاقل لحد ما يتساوو}

4_ اللهث ده هو عملية تنفس بس بتيجي في الحراره المرتفعه وبيحصل زيادة وسرعه طاب ايه علاقة اللهث بالتخلص من الحراره المرتفعه؟؟ الهواء الساخن اثناء مرورة في مجرى التنفس بيتحمل بالرطوبه فبتقل حرارته تيجي بقي لو الرطوبه الجويه مرتفعه كده كده الهواء مشبع بالمايه فاثناء مرورة في مجرى التنفس مش هيتحمل بالرطوبه وحرارته هتفضل مرتفعه…شكراً… اجهاد حراري
تعالوا نتكلم شويه عن الإجهاد الحرارى

دي نقطه بيظهر فيها أثر إرتفاع الحراره علي الطيور ودي ليها عدة آثار

1- آثر ظاهرى

ــ الطائر يدفن رأسه في الفرشه ويبتعد عن الطيور الأخرى
ــ ينخفض إستهلاك العلف ويقل وزن الطيور
ــ زيادة إستهلاك الماء
ــ يبعد أجنحته عن جسمه
ــ يتجه الي مصدر تيار الهواء
ــ يبحث عن المناطق الرطبه

2- آثر فسيولوجي

ــ إرتفاع حرارة الطيور الداخلية مما يسبب النفوق
ــ صعوبة التنفس وحدوث اللهثان
ــ إنخفاض الإنتاج ورقة سمك قشرة البيض
ــ ضعف مناعة وضعف الاستجابة للتحصينات
ــ إنهيار التوازن البيولوجي للفلورا مما يعرض الطائر للاصابه بالامراض المعويه

3- آثر تشريحي

ــ أنزفه دمويه تحت الجلد نتيجة انفجار الاوعية
ــ إحتقان الكبد والطحال والرئة
ــ إحتقان عضلات الجسم
ــ جفاف القصبة الهوائيه

#بإختصار
الطائر بتلاقيه يلهث ويفرد جناحيه وانت اصلا اول ما بتدخل العنبر الجو حر ومكتوم وكمان القراءة بتاعة الحساس بتبين الحرارة وارتفاعها او الترمومتر و دي كارثه انك تصل للحرارة دي والا يبقي في فشل في ادارة المزرعه فيه خلل عندك في التجهيزات لان انت بتعمل تبريد ومراوح وغيرة وبيبقي فيه اعلان عن موجات الحر في نشرات الطقس فانت بتستعدلها

طاب فيه موجه حارة شديدة وحاسس اننا داخلين علي إجهاد حرارى أعمل ايه… اتصرف ازاى؟؟

> زيادة معدلات التهويه وإزالة العوائق
> التاكد من سلامة التبريد وإمتلاء خزانات التبريد وجوده الخلايا وسلاماتها
> زيادة المياه للشرب ووضع الواح تلج ان امكن
>وضع فيتامين C في المياه و “أ د 3 ه” و ” ه سلينيوم “

الحرارة والإجهاد التأكسدى

واحنا بنقرأ عن الإجهاد الحرارى بنقرا انه بيعمل إجهاد تأكسدي وبيضرب الجهاز المناعي و….. الخ..
ايه هو الاجهاد التأكسدى وبعدين قولنا علاقته بالحراره……. 👈
الإجهاد التأكسدى هو عبارة عن حالة عدم التوازن في نظام العوامل المؤكسدة oxidants اوالجذور الحرة والعوامل المضادة للتأكسد (antioxidants)
اما الجذور الحرة فهي عبارة عن الكترونات منفردة وحرة تدور في فضاء غلاف الذرة أو الجزيء، هذه الجزيئات تساهم في ربط الذرات مع بعضها حيث تنجذب إلى بعضها فتتجاذب الذرات أيضا.
و مضادات الأكسدة هي عبارة عن جزيئات تحافظ على الخلايا من التأكسد
تعالي نفهم سوي الكلام الكبير ده 👈
زمان اخدنا حاجه في الكمياء اسمها عملية الأكسده ودي عمليه بيفقد فيها العنصر إلكترون و الإلكترون المفقود ده بيغير خواص الماده زي مثلا الحديد بيتأكسد فبيحصله صدأ
طاب الإلكترون ده بيروح فين
بيروح يرتبط بماده تانيه فبيحصلها عمليه إختزال وبرده بتتغير خواص الماده والالكترون ده بقي هو عبارة عن الجذور الحرة او الشوارد الحرة
طاب أيه المشكله يعني في الجذور الحرة دى؟؟
“الجذور الحرة”، وهي إلكترونات غير مستقرة تدخل الخلية، وعلى الرغم من أن للجذور الحرة دورًا مهمًّا في كثير من العمليات الحيوية، وبعضها مهم للغاية للحياة، مثل قتل البكتيريا داخل الخلايا، فخطورتها تكمن في إمكانية تفاعلها مع الأحماض الأمينية، التي تُعَد المشكِّل الرئيسي للمادة الوراثية للخلية، ال (DNA)، مما يؤدي إلى الإضرار بالخلية، وقد يسبب تدميرها.
طاب هي بتفضل غير مستقرة…؟؟
لا بتبحث عن أخرى لترتبط بيها عملية البحث دي بقي هي الإجهاد التأكسدى
تمام طاب ايه بقي العلاقة بين الحراره والإجهاد التأكسدى بالنسبه للطيور…؟؟؟
الإجهاد الحرارى بيعمل stress علي الطائر واللي بدوره بيتسبب في حدوث إجهاد تأكسدي وبتتكون الشوارد الحرة اللي بتضرب اي حاجة في طريقها تدمير خلايا او تسبب خلل فيها لإنها ممكن تضرب الDNA او تضرب الجهاز المناعي
طاب إزاى هتضرب الجهاز المناعي؟؟
الحراره بتأثر تأثير شديد ومن إتجاهات مختلفه علي الطائر والإتجاهات المختلفه دي ليها قبله واحده ليها توجه واحد ليها هدف واحد ☝
الهدف هو تدمير مناعة الطائر ولو ما إتخذتش الإجراءات المناسبة بتوصل للي هي عوزاه

تعالي نعرف مع بعض التأثيرات دي

  1. الإجهاد الحرارى ده زي ما قولنا سابقا بيؤثر علي إستهلاك العلف وبالتالي يقل الإستهلاك ويقل تباعا العناصر الغذائية الهامه والفيتامينات وبالتالي تتأثر الأجهزةالحيويه و العمليات الحيويه داخل طائر ومنها الأجهزة المناعية
  2. طبعا فاكرين الإجهاد التأكسدى…. بينتج عن الإجهاد التأكسدى شوارد او شقوق حرة وزى ما قولنا البوست السابق برده ان الشوارد دي بتضرب اي حاجة في طريقها ومنها الخلايا والأجهزه المناعية
  3. بيتكون بروتين إسمه بروتين الصدمه الحرارية وده بقي بيتكون داخل الأجسام والخلايا المناعية زى macrophage والخلايا الإلتهاميه الأخرى وبالتالي بيعيق عملها
  4. الإجهاد الحرارى بيرفع نسبة هرمون الكورتيكوستيرون وهذا الهرمون وجد أن المستويات المنخفضه منه تزيد مقاومة الطائر للأمراض الفيروسيه والميكوبلازما والعكس والعكس يحدث إذا إرتفعت نسبته يحدث ودليل هذا تجربه حيث انتخبت سلالات لزياده نسبة الكورتيكوستيرون بعد الإجهاد وأخرى نسبه اقل فوجد ان السلالات المرتفعه في نسبته بعد الإجهاد ذات قابليه اكبر الإصابة بالماريك

=في الأعمار الكبيره بيقل الاعتناء بالحراره لان الطائر بيكون قادر على تنظيم حرارة جسمه ولكن في حدود حيث انه يجب الاتقل الحراره باي حال من الاحوال عن 14 درجة مئويه حيث عندها يتأثر الطائر وينخفض انتاج البيض ودي مش معناها ان الانخفاض بس عند 14 لا كل ما قربت منها وبعدت عن المثلي بيحصل انخفاض تدريجي وكذلك في حالة الزياده فحافظ علي مدي الراحه الحرارى اللي هو من 18-24′ مئويه

نرجع لموضوعنا في حلة الانخفاض الشديد فبتلجأ لحلين:

1– أجهزة التدفئه او الدفايات
ودي أفضل الوسائل أينعم بتستهلك وقود كتييييير ومكلفه غاليه جدا ومحتاجه صيانه دوريه بس بتدينى اللي انا عاوزة
2– دفعات تدفئه
دي دفعات علفيه يعني جرامات علفيه زائده عن إحتياجات الطائر بستخدمها بدلا من وسائل التدفئة حيث يقوم الطائر بتدفئة جسمه عن طريق الطاقه الناتجة عن تمثيلها ودي ليها معادله مش اي كلام وخلاص

المعادله
الحراره العظمى _ الصغري
ـــــــــــــــــــــــــــــــــــــــــــــ + الصغرى
2
يعني اشوف أقصى حراره بتوصلها العنابر “العظمى” ولتكن 16
واقل حرارة اللي هي الصغرى ولتكن مثلا ولتكن 8
يبقي
16- 8
ـــــــــ + 8 = 4+8 =12
2
طاب المثلي 18 واحيانا بيقارن بدل منها بالحرارة 16
يبقى 18 ــ 12 = 6
كل 1 درجة يقابلها من 2 جم علف او على حسب حالة القطيع وكميه العلف المقدمه يبقي وليكن مثلا هتعطى 2 جم يبقي الدفعه 6 × 2= 12 جم/الطائر
العنبر 1000×12جم = 12000جم =12كجم

طاب ايه عيوبها ومميزاتها

*مميزاتها التوفير يعني مبتكلفش كتير زي وسائل التدفئه الخطرة واللي بتحتاج صيانه ووقود
*عيوبها عيوب كتير حدث ولا وحرج واهمهم نقتطين
ــ الاولي إنها بتأثر علي التجانس وكمان مبتديش نفس كفاءة الأجهزه
ــ ثانيا بتأثر علي الأوزان ودى بتضر الانتاج بعد كده
ـــــــــــــــ طاب تنصح بأيه
بالنسبالي مادام دخلت طريق يبقي ادخل بتقلك ومتستخسرش
يعني الأفضل وسائل التدفئه

التوازن الحرارى

يعني ايه توازن حرارى بص مبدئيا كده في معلومات انت بتبقي عارفها ومش عارف تعبر عنها لإنك مش عارف المصطلح او الإسم العلمي ليها……
درجة حرارة الجسم الداخليه للطائر من 41-42 درجة مئوية ودي أعلي بكتيير من درجة حرارة العنبر او درجة حرارة الوسط او الهواء وبالتالي بيحدث فقد في الحرارة زي ما قلنا سابقا من الأعلى حرارة للأقل حرارة ولهذا كان لابد من حدوث توازن حراري بين ما ينتج الجسم من حرارة وبين ما يفقد الجسم من حرارة حيث يقدر الإنتاج الحرارى بنحو من 5.6 الي 6.5 كيلو كالورى /كجم /سا
وده بيختلف من طائر لأخر حسب العمر والوزن و…..
يعني معني كده يا مولانا ان الجسم بينتج حرارة طبعا طبعا امال ايه زى الحرارة الناتجه عن عمليات الأيض
المهم وسائل التخلص من الحرارة كتيره واتكلمنا عنها قبل كده زي
الإشعاع الحرارى
التوصيل الحرارى
الحمل الحرارى
هواء الزفير
فقد الحرارة مع الزرق

دمتم في رعاية الله وحفظه
م/أحمد يوغرى

بيت الدجاجة

م / احمد يوغرى

مهندس أمهات الدجاج اللاحم وباحث في علوم الدواجن

مقالات ذات صلة

زر الذهاب إلى الأعلى